Yungib ng mga Hikbi

 
labindalawang nakabiting paniking lampara
bukod tangi ang isa, inabandona ng buhay
mala-gatas na sisidlan, patagong dumudungaw
pinanghaharian ng espasyo ng kawalan
 
matutulis na pangil ng mga batong inulila ng haplos
pinagpatong patong na lungkot ng itim na kaulapan
luntiang halaman agaw-eksena di alam ang dahilan
krus ng muling pag ahon at pagsulong
 
reboltong pinaghihinaan sumisisigaw ng pagpapaubaya
nangungusap ang pagsuko at pagpapasya
talsik ng liwanag sa mata’y mapangsilaw
mala-gagambang gumagapang sa yungib ng kamatayan
 
tulis ng pangamba ng hati hating istorya
liko likong  lubak sa nagyeyelong lagusan
tutuklasin  ang rurok ng balon
dudukuting parang kidlat ang kamalaya’y babalikwas
 
talim ng bigwas mula sa  pagka bihag
kuweba’y lilisanin at maglalayag na animo’y bulak
iduduyan at lulutang sa katahimikan ng Kanyang yakap
makikinig at  makikipagniig sa yungib ng mga hikbi
 

BLOG COMMENTS POWERED BY DISQUS